Документы
Уважаемые друзья!
Мы продолжаем публикации в рубрике детские сказки на языках народов Карачаево-Черкесии.
Сегодня мы публикуем "Колобок" на абазинском языке. Перевод Чекалова Георгия Константиновича, редактора абазинского языка, переводчика, публициста, члена Союза журналистов РФ.
ХІампІал
Йаъан-йбзазун тажвкІи лыгажвкІи. МшкІы алыгажв дахІватІ:
– ХІампІалкІ хІызбымрыдзума, атажв.
– ЙгІазлысхуаш ачІвыйа? Шыла гьхІымами.
– ЙауыпІ, атажв! Ашылатара гІагъьгъьа, аца гІапса – закІ гІартыцІпІ.
Атажв ашылатара гІалыгъьгъьатІ, ацагьи гІалпсан – шыла гІвнапІыкІ гІазылкІкІытІ. ХъкІыла йылкІвхІатІ, хвшала йылрыдзын йхьныс ахъышв йыквылцІатІ.
АхІампІал ауаъа йыквын-йыквын, уацІыхъван йгьажьытІ, ахъышв йгІакІашван ачІварта йыквшватІ, ачІвартагьи йгІакІашван аджьагьашва йыквшватІ, йгьажьуамца ашвхъымса йнадзатІ, ауыгьи йахъыпан абидоль йнашылтІ, абидольгьи йджвылгьажьын ахъалырта йыквшватІ, ауаъагьи йбгъагьажьын апахь йджвылцІтІ, агвашвла йнаскІьатІ, йгварцІын йгьажьуа-йгьажьуа йцитІ.
АхІампІал шгьажьуазымца ажьакІ гІапыралтІ.
– ХІампІал, хІампІал! Са уара усфуштІ!
– Суымфан, ажьа ланазачкІвын! АшвакІгьи узысхІвапІ, – ахІван ахІампІал ашва джвыквнацІатІ:
Сара аца сгІатырпссатІ,
Ашылатара сгІатрыгъьгъьатІ,
ХъкІыла жвпІатагьи сыркІвхІатІ,
Хвшала бзита снадырхъатІ,
Сдрыхьын сагІа снадырдзатІ;
Сара дадагьи сичвгІардатІ,
Сара нанагьи сылчвгІардатІ,
Уара ажьа уакІвпІта – хабар уызбитІ!
Ауи ахІван йъацузла йгьажьыхтІ, ажьагьи ауи йызбама-йгьсымбама-хІва йгІанхатІ.
АхІампІал шгьажьуазымца квыджьмакІ гІапыралтІ.
– ХІампІал, хІампІал! Са уара усфуштІ!
– Суымфан, аквыджьма ларджь! АшвакІгьи узысхІвапІ!
Сара аца сгІатырпссатІ,
Ашылатара сгІатрыгъьгъьатІ,
ХъкІыла жвпІатагьи сыркІвхІатІ,
Хвшала бзита снадырхъатІ,
Сдрыхьын сагІа снадырдзатІ;
Сара дадагьи сичвгІардатІ,
Сара нанагьи сылчвгІардатІ,
Уара аквыджьма уакІвпІта – хабар уызбитІ!
Ауи ахІван йъацузла йгьажьыхтІ, аквыджьмагьи ауи йызбама-йгьсымбама-хІва йгІанхатІ.
АхІампІал шгьажьуазымца мшвыкІ гІапыралтІ.
– ХІампІал, хІампІал! Са уара усфуштІ!
– ХІампІал суфапІ, уара амшв пІажважва!
Сара аца сгІатырпссатІ,
Ашылатара сгІатрыгъьгъьатІ,
ХъкІыла жвпІатагьи сыркІвхІатІ,
Хвшала бзита снадырхъатІ,
Сдрыхьын сагІа снадырдзатІ;
Сара дадагьи сичвгІардатІ,
Сара нанагьи сылчвгІардатІ,
Уара амшв уакІвпІта – хабар уызбитІ!
Ауи ахІван йатагьажьхтІ, амшвгьи ауи йызбама-йгьсымбама-хІва йгІанхатІ.
АхІампІал шгьажьуазымца багакІ гІапыралтІ.
– Уымш бзита, хІампІал! УачІвбзичкІвынйа!
АхІампІал ашва гІаланаршватІ:
Сара аца сгІатырпссатІ,
Ашылатара сгІатрыгъьгъьатІ,
ХъкІыла жвпІатагьи сыркІвхІатІ,
Хвшала бзита снадырхъатІ,
Сдрыхьын сагІа снадырдзатІ;
Сара дадагьи сичвгІардатІ,
Сара нанагьи сылчвгІардатІ,
Бара абага бакІвпІта – хабар бызбитІ!
– ЙачІвытагьи ашва пшдзайа! – ахІватІ абага. – Ауаса сара сажвын бзита йгьызгІахуам. СпынцІа угІаквчІвата ужвыгьи зны рыцІа дута йуымхІвума.
АхІампІал абага апынцІа йыквчІван йара ауи ашва атахІвахтІ.
– УызгІвадахатІ, хІампІал! Ашва бзидздзапІ, ужвыгьи зны саздзыргІврын! Сыбыз угІаквчІвата ужвыгьи зынзаджвыкІ йсзыхІвах, – ахІван абага абыз гІатнахтІ.
АхІампІал ауи абыз йыквчІватІ акІвын абага – «ГІам!» – ахІван йафтІ.
